琴晚嗰集，紅油庫爆炸將Laughing炸咗落海，相信好多觀眾都好震撼。當然，要拍攝咁震撼嘅場面，幕後嘅工作人員花咗唔少心機之餘，兩位主角法拉同Laughing都犧牲唔少。

 

究竟有幾辛苦？華仔畀大家睇下現場花絮啦！

 


睇吓上面張相，雖然法拉笑笑口，但佢要著住全副戲服，浸喺水入面，真係一啲都唔容易。再睇吓左邊，攝影師為咗方便，直頭連上衫都除埋出嚟。據講拍完呢場之後，無論工作人員同兩個主角都浸到皺晒皮呀！

 


除咗喺水入面，佢哋喺沙灘度都拍咗一幕，大家睇真啲Laughing對腳仍然要浸喺水入面架，至於法拉就醞釀緊情緒，準備拍呢場失去愛人嘅傷心戲喇。

 


Laughing認真敬業呀，又浸喺水度，又瞓喺沙度，手腳仲要畀膠帶綁住，都仲要笑得出！

 

至於好多朋友問華仔，究竟Laughing有無死到，華仔就梗係唔會透露劇情啦，今晚繼續收睇《潛行狙擊》啦！（小貼士：華仔同朋友傾開，朋友甲問Laughing有無死，朋友乙話主角死咗仲邊有戲做，華仔就覺得佢推斷得好合理喇。）