2010-8-20HTC Aria幫法拉譯劇本

falafan

關心妍捧欣宜唱得扮得
東方日報2010-08-20

已為人妻的關心妍（Jade）早前轉投新公司重新出發，並與陳法拉和鄭欣宜等做同事。Jade笑言預料遲早會有爭寵是非新聞，惟她表示與兩人相處融洽，又大讚欣宜才是她的前輩！

關心妍已有兩年沒推新專輯，直言愧對「J迷」，惟她表示音樂創作不能操之過急：「做音樂冇得心急，要好多嘢配合。（歌迷等好耐？）我對佢哋有愧，其實之前我都有出福音碟。（擔心「J迷」流失？）流失一定有，依家最緊要係點樣打動番佢哋。」

讚法拉音準

Jade轉投星煥國際有限公司後與法拉和欣宜成為同事，她笑言遲早又被傳三人不和：「是非難免，根本避唔到，大家最緊要記住新公司名！」Jade直言三女相處融洽：「我同法拉及欣宜好多時聚埋，大家冇芥蒂，爭乜嘢寵？」她續大讚欣宜唱功出色：「佢先係前輩，唱得好好，聲底靚，扮嘢又一流，係個好努力嘅女仔，加上我哋都喺溫哥華長大，特別多話題。（法拉呢？）佢好靚女，唱歌聲底亦好，穩定性強、音準出色。」

老公冇詐型

即將於九月底出碟的Jade預計會忙個不停，但她坦言不擔心老公詐型：「佢知我鍾意唱歌，都贊成我出碟！（婚姻狀況？）美滿。（慣晒被叫楊太？）都慣o架！（炮製BB？）炮製咗隻碟先啦，我都要同老公講唔好意思，我哋都不設防，其實希望有三個小朋友，生兩個領養一個。」

falafan

HTC Aria幫法拉譯劇本
太陽報2010-08-20

陳法拉呢排紅到爆，《蒲松齡》播完冇耐，嚟緊仲有《公主嫁到》同《巾幗2》接住上。但訪問先知，原來呢位竹升妹其實中文麻麻，讀劇本時遇到艱澀詞語都會頭痕。不過佢話自從用咗新出嘅HTC Aria手機後，透過內置嘅《Dr.Eye》翻譯軟件，就可中英互譯兼學埋發音，以後唔使靠人都能熟讀劇本啦！

講軟件，Android Market一定唔及App Store咁多，但HTC可愛之處在於會自家開發及外購軟件，以這部HTC Aria為例，內置Friend Stream及Footprint等工具不在講，還免費提供翻譯軟件，咁賣大包法，無怪乎在最新手機市佔率調查中，HTC可打進全球五強之列。

除注音、拼音、筆劃及倉頡外，還提供中英文手寫輸入法，啱晒法拉呢啲竹升妹。

資深翻譯軟件

手機查字典方法有很多，無論Yahoo!或Google都有網上翻譯服務，只不過以上方法都要線上查詢，翻譯效率不但受制於網絡速度，仲分分鐘要支付高昂的數據費。今次這部HTC Aria最大賣點就係跟老牌翻譯軟件《Dr.Eye》合作，免費提供英漢、漢英雙向翻譯服務，所有字庫已預先儲存在記憶卡內，就算唔上網都可照查生字。除文字解釋外，佢還提供真人發音，遇到難明字仲可以用生字簿記低，方便日後問人，功能媲美唔少翻譯機。

影相直掟社交網

講番機身設計，Aria可謂HD mini嘅倒模，同樣採用3.2吋屏幕、拋光黑色外殼及鮮黃色內籠，若不是芒底多了一個光學感應器，驟眼看還以為是舊機翻新。而且跟mini一樣，Aria同樣是為女士而設，因此厚度僅11.7mm，而重量亦只得115g，以智能手機來說絕對「身輕如燕」。至於鏡頭方面，500萬像素兼冇補光燈，規格唔算高，但就對應人臉及篤芒對焦，加埋影完相可直接掟上Facebook、Flicker同Twitter，至啱女生自拍後極速分享。

喪煲Flash短片

系統方面，Aria仲未升呢上Android 2.2，因此睇Flash還要依賴Flash Lite，搞到好多網絡短片都睇唔到。然而，若用戶透過獨家網絡商數碼通出機，就可利用X-Power把短片轉換成手機格式；實測所見，唔單止睇到晒ontv嘅新聞短片，還可以駁上mytv重溫TVB劇集，流暢又唔窒，真係去到邊都可以喪煲法拉新劇。另外，一如HTC其他機種，Aria亦內置大量Widget小工具，未計必備嘅Friend Stream同Footprint，其他Widget亦多達30款，就算主頁有成7版都放唔晒！

機檔案

制　　式︰GSM四頻、WCDMA 900/2100MHz

操作系統︰Android 2.1

屏　　幕︰3.2吋電容式，320×480解像度

鏡　　頭︰500萬像素自動對焦

記　憶　體︰內置512MB ROM、384MB RAM，

　　　　　支援microSDHC記憶卡（最高32GB）

對外連接︰藍芽2.1、USB 2.0、7.2Mbps HSDPA、

　　　　　Wi-Fi

通話時間︰420分鐘（2G）、350分鐘（3G）

備用時間︰360小時（2G）、400小時（3G）

體　　積︰103.8×57.7×11.7mm

重　　量︰115g

Gilbert

falafan

占

falafan

这是广告，随便扯的。