楊秀惠陳法拉孖公仔同居
太陽報2005-11-04
陳法拉（左）和楊秀惠同是「華姐」出身，話題多多，難怪一拍即合。
楊秀惠（左）和陳法拉堅持孖住上，出雙入對，不怕惹同性戀傳聞。
近期娛樂圈興起一陣同「性」相吸熱潮，不過新人楊秀惠和陳法拉仍然冇有怕，堅持一起居住之餘，就連出街都孖到實，誓要做一對同居密友。
無線新人楊秀惠和陳法拉同是華裔小姐出身，雖然來自不同地區及參選年份，但她們同樣是離鄉別井來港發展，現時獲公司安排一齊居住而成為同居密友，互相扶持在電視圈大展拳腳，實行孖住上，絕不怕會惹來同性戀傳聞。
早前陳法拉已簽約無線成為包薪藝員，無線更安排她與去年曾選華姐的四葉女楊秀惠，於將軍澳中心一單位「同居」。
唔怕傳同性戀
曾經在港獨自生活的楊秀惠說：「之前自己住，最怕收工一個人屋企無所事事，好鬼悶，就算病都冇人理，好陰功！依家同居，多個人有傾有講好開心，我哋除咗返工之外，成日都會一齊去街、食飯，成對孖公仔咁，就算我有心事，都淨係會同法拉講咋！依家同性戀好普遍，驚唔驚畀人以為我哋同性戀？唔驚，首先我哋根本唔係，其次係唔使理人點睇。」
而陳法拉表示讀書時已是住宿舍，慣與人同住，不過跟楊秀惠住，感覺特別高興，她說：「佢份人好樂觀，我哋一齊住好開心，大家互補不足，好似做家務咁嘅！佢就鍾意吸塵、掃地，我就鍾意煮嘢食，其他家務就輪流做，咁樣唔會有拗撬。」
