陳法拉 獸性大發
新報2010-07-09
狐狸,一向給人奸狡的印象;不過,在劇集《蒲松齡》中,陳法拉飾演的,卻是一隻性格單純又富正義感的狐仙。雖然天性善良,但可惜後來卻因愛成恨,受陳錦鴻唆擺,誘發出狐狸本來的妒性,獸性大發下將鍾嘉欣變成狐狸。縱然從狐仙變成害人的狐妖,但法拉仍堅持動物思想簡單,沒有害人之心,相反,人……就有極為醜陋的一面!撰文:霍淇
法拉飾演的令狐小翠,是一個心地善良的狐仙,在法拉還是小白狐時,曾被獵戶所捕,幸最後得飾演馬浚偉(馬仔)爸爸的岳華相救,其後法拉感恩圖報,救回剛出世的馬仔一命。
劇中的法拉對馬仔演的蒲松齡一見鍾情,為接近馬仔,法拉不惜女扮男裝,但可惜馬仔卻鍾情鍾嘉欣,後來在陳錦鴻的加入下,引發出一段四角關係。
人性好醜惡
動物世界中能容立一夫多妻,但人的世界卻不一樣,因為自己是狐狸,法拉一直都不明白為何不能跟馬仔及嘉欣3人一起結婚,令她很不開心,其後加上被嘉欣發現其狐狸身份,令本性善良的她獸性大發,把嘉欣也變成狐狸。「因為佢處處針對我,又用好多方法想迫我現身,所以我就將嘉欣變成狐狸,等佢感受自己被人誤會係狐狸的痛苦。」
法拉謂,縱然露出狐狸尾巴,她認為這只是動物的本性。「動物好簡單,反而人性就好醜惡,有妒忌有猜疑,就好似屋企養嘅寵物一樣,佢哋好善良,無論發生咩事都會對主人好忠心,唔會有害人之心,可能有時啲寵物會抓你一吓或咬你一啖,但佢嗰種係本能反應,唔似人咁衰,所以呢套劇其實可以令人去反省人嘅醜惡一面。」
望成經典劇
劇中的法拉經歷了四角戀,現實中的她直言未試過,問到若遇上兩女爭一男的情況會如何處理?她認為兩人相處時最要緊的就是溝通及感覺。法拉理性的說:「人嘅感情太複雜,唔係咁單一同單純,所以好難融入到有3個人一齊相處。兩個人已經好複雜,兩個鬧交已經係好麻煩,如果再加多個一齊鬧交,我真係覺得搞唔掂,接受唔到呢樣嘢!」
現時,法拉正忙拍攝《巾幗梟雄之義海豪情》(《巾幗2》),問到新加入該劇會否為收視感到壓力?她想也沒想便說:「冇,預咗會收得好過上一集,因為我未見過有咁好嘅劇本、咁好嘅卡士、班底、導演同幕後,所有人係盡全力去做好一套劇,希望呢套可以成為2000年後無綫嘅經典劇集,因為真係好好,睇劇本已睇得好感動,仲睇到喊。」
後記:盡全力做到最好
《巾幗2》有多種極好元素聚在一起,相信會間接使演員形成無形壓力,不過法拉卻輕鬆地謂自己沒有絲毫壓力,就算能力有限,只要做好自己便問心無愧。她說:「一啲壓力都冇,反而係希望有多啲時間去諗吓個角色點做,有時拍完之後會覺得自己拍得唔係咁好,呢個係一個學習過程,會覺得其實自己Keep住都係有進步,會學到嘢!我每次做嘢都係會盡全力去做,反而唔會理啲壓力,拋得個身出嚟做,一定要將佢做到最好。」 |