|
賣身 TVB博攞獎 謝雪心：同高層飲過咖啡
2009年11月13日
對手個個舉白旗，四奶奶鄧萃雯穩奪今年視后唔使估。戰幔拉開，近排網友轉移陣地開始估女配角獎花落誰家。謝雪心憑《宮心計》中「姐姐想借嘅，係妹妹你個人頭呀！」嘅出位對白，加上早前《巾幗梟雄》飾演奸到出汁的大奶奶，形勢一面倒壓過其他對手。
郭太后有價有市，無綫遂積極拉攏她做「自己人」簽經理人合約，更暗示女配角獎一定「眾望所歸」。據知近日雙方傾掂數，賣身兩年簽俾無綫的謝雪心，周二（ 10日）即風騷說：「係呀，我早排先同佢哋（無綫高層）飲過咖啡！」
早年長駐亞視的謝雪心，今年年初過檔無綫簽普通藝員合約，僅拍了兩個電視劇即受網友、師奶熱捧。大奶奶、郭太后兩角色深入民心。無綫眼見近年劇集吓吓要靠甘草食糊，加上謝雪心擺明係「優質股」，早前即有高層約她飯局，游說她簽經理人合約。席間有人更暗示做了 TVB「自己人」後，女配角獎即可袋袋平安。「其實心姐過咗無綫，個個有眼睇佢嘅表現，加上 TVB冇乜好似佢咁有台型嘅奸角，做奸角做到個個讚， TVB梗想簽佢做『自己人』啦！早排樂小姐（樂易玲）同珍姐（曾勵珍）先約過佢食飯，同佢傾合約嘅嘢！」知情人士說。
帶挈愛女過檔
手上大把籌碼，謝雪心更乘機為剛滿約亞視的 31歲獨生女珈穎鋪路入無綫。除了錫女錫到燶，珈穎的助導男友阿 Joe亦得準外母帶挈，今年初謝雪心與他已一齊過檔無綫。「珈穎喺亞視做極唔起，連女主角都好似未做過，心姐得佢一粒女，梗係想拉埋佢過檔。既然公司高層開到口，心姐乘機傾埋佢個女囉，一心諗住母女檔拍住上。班高層開頭都話諗吓先，不過最近就轉咗口風，話心姐出到聲就一定冇問題，兩邊應該傾掂數。」知情人士說。
網友力撐拍前傳
縱使謝雪心角色在《宮》劇已經仙遊，但網友在 facebook群起悼念太皇太后，大讚謝雪心演技，甚至有人提議 TVB拍攝太后前傳。
網友齊哀悼
剛過 56歲生日的謝雪心，入行 49年，年初過檔無綫後，憑《巾幗梟雄》大奶奶角色撈到風生水起。最近《宮心計》的郭太后早死，更有網友自製「太皇太后」網頁全民哀悼，又有網友提議開拍「宮心計太皇太后前傳之巧奪千宮」，激烈反應比起萬人拜祭 laughing哥有過之而無不及。不過郭太后「霸氣」背後，現實中心姐絕對係百分百顧家小女人。除了是廿四孝母親外，與丈夫陳啟亨結婚三十多年，夫妻恩愛如惜，每逢心姐外出，老公更會做柴可夫車出車入。
「個女識晒呢邊啲 uncle」
對於簽約換獎，周二（ 10日），謝雪心出席無綫節目巡禮時，捉實記者手緊張地說：「唔好咁講，今年有好多勁敵，仲有視后米記（米雪）呢！（知你有同高層食飯喎？）嗯……（咁即係有啦！係咪傾合約問題？）其實都唔一定係食飯嘅……咁飲咖啡都得 o架。係呀，早排都有同佢哋飲過咖啡！（你個女都過嚟無綫喎，係咪交換條件之一？）吓！嗯……其實佢好細個已經識呢邊啲 uncle，佢哋都好熟 o架！」言下之意，愛女過檔已經十拿九穩。周三（ 11日），記者致電無綫製作資源部總監樂易玲，她說：「其實心姐一早已經係我哋藝員。（知佢會簽經理人合約喎！）依家我開緊會，唔講啦！」隨即匆匆掛線。
其他配角走勢
今屆女配角人選，擺明是老戲骨互相過招，呼聲比其他妹妹仔候選人高出一截，除了陳法拉失驚無神露 bra較為「凸」出，其餘女角全屬陪跑一族。
黑馬 陳法拉《有營煮婦》
《有》劇並非叫好叫座，不過陳法拉在黃金時段除淨個 bra走嚟走去，全城嘩然，輕易製造話題，陳法拉實屬黑馬人選。
次熱 關菊英《宮心計》
前年憑《溏心風暴》的巴辣細契奪得「我最喜愛的角色」獎，今年阮司珍由於角色較為內歛，雖屬好戲之人，但演技未能真正發揮，因此呼聲不及郭太后。
半冷 惠英紅《宮心計》
在《宮心計》中，惠英紅飾演愛搬弄是非的譚司膳，不過戲份一般，想問鼎女配角獎，仍屬漫漫長路。
陪跑 陳茵媺《烈火雄心 3》
在《烈火》中，剪了男仔頭的她，全劇着住緊身衫跳來跳去。套劇播完，陳茵媺忽然多了一批宅男 fans，但她始終演技幼嫩，對於爭奪女配角獎，只屬陪跑分子。
陪跑 湯盈盈《蔡鍔與小鳳仙》
湯盈盈一直跳不出飾演妓女或壞女人框框，在《蔡鍔》劇中，湯同樣飾演青樓女子，角色熟口熟面，難有突破，同樣屬陪跑一族。
有約有獎
每年臨近台慶，視帝視后均爭崩頭，不時傳出無綫誘藝員簽賣身契換獎的消息，並非空穴來風。
08年，夏雨和米雪憑《家好月圓》分別奪視帝視后，二人事前曾與 TVB高層傾簽合約細節。
07年台慶，李司棋和關菊英憑人氣劇《溏心風暴》提名視后及我最喜愛女主角。事前是非不斷，有指 TVB以 500萬利誘二人簽賣身契，結果李奪視后寶座，關則奪最喜愛女主角一獎。其間兩人亦不約而同與 TVB簽約。
04年，無綫羅致一直簽部頭約的黎姿成為旗下經理人合約藝人，因而傳出以合約換獎的消息。最後憑《金枝慾孽》提名女主角的黎姿，成功打敗鄧萃雯贏得視后寶座。 | 
狗仔卡
发表于 2009-11-5 15:09:51
收藏
顶
踩
提升卡
置顶卡
沉默卡
喧嚣卡
变色卡
显身卡
发表于 2009-11-29 22:23:44
发表于 2009-11-21 01:34:32
发表于 2009-11-14 21:08:38
千脑提供附件上传 不限文件类型，不限制文件大小(自拍、原创图片建议使用“图片”上传,可批量上传)