2008-1-22直擊高層飯局 婆媳糾紛煩爆 黃宗澤借醉黐樂易玲

falafan

直擊高層飯局 婆媳糾紛煩爆 黃宗澤借醉黐樂易玲
頭條日報2008年1月22日

　　經過一輪收視低潮期後，踏入08年，TVB憑《野蠻奶奶大戰戈師奶》重奪觀眾的信任，收視勁升，而無綫另一套劇集《律政新人王2》亦得《野》劇的帶挈，平均收視有31點，製作資源部副總監樂易玲應該可以鬆番一口氣。收視升，心情好，樂小姐立即請食飯慶祝，本星期一晚7時半，TVB老嫩大軍17人齊齊扮到靚一靚，逐一到達IFC的國金軒開餐，當中有新視帝陳豪，亦有上位姐仔陳法拉，連好戲老臣子劉兆銘亦是座上客；不過，論當中新聞人物，必屬近期被婆媳糾紛煩到頭都大埋的黃宗澤(Bosco)莫屬，當晚耳根難得清靜的他，趁散席後更借醉黐樂小姐博同情，識撈又進取，Bosco好嘢。採訪：張詠森　黃燕玲

　　黃宗澤一向識撈識擦，對前輩好口，對同輩又玩得，連一向Cool爆有格的汪阿姐都被呢位油嘴哎吔仔融化。加上播映中的《野》劇收視同口碑俱佳，令 Bosco重登TVB萬人迷的寶座，不讓新人王林峯攞晒彩。不過，有傳Bosco母親不忿獨生愛兒錫女家多過阿媽，大力反對兩人買豪宅結婚，令視杏兒為結婚對象的他苦惱萬分。

　　飯局之星笑騎騎

　　高層飯局開始冇耐，樂小姐笑意盈盈的步出酒家門口，然後對記者作出體貼的勸告：「不如咁啦，比你哋影張大合照交差，影完就走啦，啲同事唔敢飲酒呀。」3 個小時後，穿上一身黑色Deep V晚裝被指姣上門的官恩娜一馬當先步出門口，然後，大班飯局之星齊齊離開，阮兆祥跟劉兆銘同陳鴻烈一齊行，三個加埋百幾歲的朋友仲邊行邊玩，最後更笑到彎晒腰連路都行唔到。而官恩娜同楊秀惠兩位近期的緋聞之友就孖實密密傾住走，不時細聲講大聲笑，但論歡欣度，一定唔及行在兩位前面的黃宗澤。

　　貼身護駕樂小姐

　　一散席，黃宗澤已緊貼樂小姐離開酒家，然後，人群逐漸四散，Bosco即把握時機上前扶實樂小姐，跟着再乖巧地貼着高層而行，不時點頭和應，又不時大笑，得樂小姐笑逐顏開心都溶晒。雖然仲有成年先到台慶頒獎禮，但聽甜言蜜語冇人嫌多，加上鄭嘉穎同吳卓羲兩位樂小姐愛將已不復當年勇，近期被婆媳糾紛煩爆，但聰明的Bosco當然知道想事業更上一層樓，年頭開行Turbo出力係最佳時候。

　　眾星酒後齊亂性

　　眾星分批行到電梯口，不知是誰先發現記者，然後，為數十幾人的阿哥阿姐齊齊對住鏡頭狂做出V字手勢，做完手勢又圍埋一堆狂笑，笑完又做，前後不知舉了多少個V，但明顯酒後發傻的眾星還不厭其煩，玩完又玩，甚至入到電梯都仍然唔肯罷休。

　　宗澤和杏兒昨日出席宣傳活動時，齊否認有雜誌報道指他倆同居的消息，杏兒卻指宗澤間中會到她香閨借用浴室。

falafan

FROM 宗生选泽 eli

東周刊 第230期