編審解構夭心劇本 《家好月圓》兩集一高潮人人有戲

cusa2005

溏心風暴之家好月圓  幕後玩家
編審解構夭心劇本 《家好月圓》兩集一高潮人人有戲
蘋果日報2008-09-14

        結局倒數仲有7日--提到張華標的名字時，或者你會禁不住問：「他是誰？」這位無綫資深編審曾編製《大家族》、《蓋世豪俠》、《巨人》等等經典劇集，去年與老拍檔監製劉家豪和同屬編審之一的薛家華，聯手炮製《溏心風暴》，當時確實掀起一陣熱潮，不單止令李司棋、關菊英和夏雨等老戲骨聲名大噪，戲中一句句夭心夭肺的精警對白更風靡全城。其後無綫火速動用原班人馬開拍姊妹作《溏心風暴之家好月圓》，對此，張華標不諱言是一個新挑戰。撰文：何慧斯
       
        今次在《溏心風暴之家好月圓》中，雖然起用原班人馬上陣，故事主題由鮑魚變成月餅，不過角色故事通通「大兜亂」，除了夏雨化身為Jo飽飾演一家之主外，「大契」李司棋和「細契」關菊英飾演姊妹，「奸到出汁」的奸角紅姨由米雪飾演，楊怡、陳豪、林峯、陳法拉、黎諾懿和溫家恒等人飾演荷媽和Jo飽的子女，更加入李香琴、周驄、楊天經和徐子珊等新成員助陣。
       
       
        《家好月圓》每個角色都可以獨當一面，每人都會有數場戲推動劇情，高潮迭起令觀眾追劇更加肉緊。

       
        上一輯分飾大、細契的李司棋（右）與關菊英於《家好月圓》變成姊妹。
       
       
        米雪飾演的紅姨害荷媽一家，難怪成為網民聲討對象。
       
        9個月寫劇本
       
        張華標透露今次花了9個月的時間去編寫，過程亦有別於過往，張華標說：「其實今次創作過程真係好開心，大家都好拼勁去做好劇本，以前我哋搞清楚劇本會由編審分場再交編劇返屋企寫，不過今次我遇到一班好好嘅班底，大家坐喺編劇房入面逐句度，所以好多時劇本唔使返到屋企已經完成。」
       
        然而，最重要還是一開始已經確定了演員的身份，張華標說：「今次我哋一班同事知道演員人選，雖然我哋要避重就輕去安排感情線同配搭，盡量有別於上一集，難度當然有，不過亦因為呢個關係，喺角色嘅特色、性格上可以話係為演員度身訂做。」
       
        上一輯《溏心風暴》的夭心夭肺罵人金句備受傳媒和觀眾所追捧，到《溏心風暴之家好月圓》中，更加插了不少極具生活化的金句和「爛gag」，左一句「唔使驚，荷媽喺大廳」、「人在天堂、錢在銀行」，右一句「阿婆行得快、一定有古怪」、「阻人發達，猶如殺人父母」，當中最為人所熟悉的，可算是「攞返嚟養嘅男仔叫攞仔，咁攞返嚟養嘅女咪叫攞女。」

       
        全劇以餅舖作重心，其實是借月餅講家庭講團圓。

        「冇刻意度金句」
       
        張華標坦言當初加插這些對白只是集體討論的結果，並非刻意去營造出來，更加未有想過會被觀眾追捧，他說：「當初係我哋喺創作過程上，發覺原來我哋身邊好多長輩都鍾意講『老坑話』，亦因為劇中人物來自草根，所以一家人好容易會有口舌之爭，結果喺劇情需要、集思廣益嘅情況下，對白不期然變得刁鑽，聽起嚟亦會覺得比較特別。事實上我哋都冇刻意去度金句，亦未有諗過會作賣點，直到劇集出咗街之後，先會知道觀眾嘅喜好，對邊啲對白有興趣。」
       
        看罷《家好月圓》後，或許你會發覺每一集都經過計算，無論感情和對白方面都恰到好處，對此，張華標表示：「因為呢部劇演員眾多，所以我哋採用類似處境劇的形式去拍，每兩集變咗做一個單元，呢個編排會令每集有一個人做重心，而且又好易有高潮位，故事情節生活化多咗，令我哋更加鍾意寫，如果你問我，我個人比較鍾意《家好》，可能戲入面涉及兄弟姊妹嘅感情，而且大家又來自草根，自然感受到嗰種生活化。」

       
        張華標自言兩輯《溏心風暴》較喜歡《家好月圓》，因為一眾幕後班底合作得更好。陳順禎攝       

        「感激幕後班底」
       
        雖然《家好》每周的收視高企，不過作為編審的張華標表示即使劇集已經到了尾聲，他仍然擔心觀眾的反應，談到劇情的最新發展，張華標也露了少許口風，他說：「今次故事係以月餅做主題，月餅係代表中秋節，中秋節係一家團圓的好日子，所以唔會有太大嘅缺陷，最終會係大團圓。」
       
        張華標在訪問完結前，突然有感而發地說：「我覺得演員嘅演出當然感人，不過幕後嘅創作過程亦令我非常感恩，我哋一班嚟自唔同年代嘅同事，合作期間不經不覺凝聚咗一股動力，呢個動力推使大家全力去創作劇本，唔介意捱更抵夜去工作，目的只係唔想令觀眾失望，各個討論區嘅意見亦對我哋有好大嘅得益，雖然未知將來會唔會再開《溏心3》，不過我都好希望可以同呢個班底再度合作，再擦出另一個新火花。」
       
       
        鍾嘉欣與黃宗澤的感情猛被觀眾罵肉麻兼無聊。

        素秋、凌B抵鬧
       
        談到有不少觀眾不滿于素秋（鍾嘉欣）和凌B（黃宗澤）的感情發展，以及路嘉美（徐子珊）工心計的演出，張華標笑稱或許因為荷媽的關係，才引致大家的批評，他說：「可能呢部戲忠奸太過分明，觀眾又特別鍾意荷媽一家，所以一旦有人傷害呢一家人，一定會俾人鬧，好似一向都受歡迎嘅公公（周驄），都試過因為叫阿月（楊怡）唔好理咁多屋企事而俾觀眾同網民批評。」
       
        談到劇中于素秋和凌B的一段情太牽強，張華標則表示：「o依家為呢段情作出批評，似乎言之尚早，大家應該等成套戲結局後再為呢段感情作出總結。」至於有否替三人不值時，他則笑言：「一個演員嘅演戲生涯會演好多唔同嘅角色，當中一定會有好同唔好，今次佢哋只係遇到一啲唔討好嘅角色。」
       
        溏心人語：編審之選
       
        既然《家好月圓》是張華標的心血結晶，他自然對這個親生仔的優點有更深入的看法，他日前接受訪問時就透露自己對劇集的心水之選。
       
       
        陳法拉（左）雖然飾演啞女，但她的金句卻叫張華標最難忘。
       
        最愛金句
        『我的嫲嫲是月亮，初一十五不一樣！』
        「喺咁多句金句入面，我最鍾意阿慶（陳法拉）講嘅一句：『我的嫲嫲是月亮，初一十五不一樣！』我記得呢句說話係親耳喺個小朋友嘅口中聽到，嗰刻係好感受到小朋友對嫲嫲嘅感覺。」
       
       
        拍攝陳法拉送急件的戲份時拍足一日，其間更因修路要更改部份劇情。
       
        最愛場面
        預演短訊教路
        「有一場戲講阿慶（陳法拉）返新工時，為咗爭取表現，於是主動提出送急件去尖沙嘴，不過期間因為迷路，於是乎荷媽（李司棋）同管家仔（林峯）透過短訊阿慶點去目的地，當時寫劇本嗰陣，我哋兵分兩路，一部份人留喺公司，另一部份喺尖沙嘴邊行邊打電話返公司講條路線，點知到拍嗰陣又遇上整路，最後要作出少許改動。」
       
       
        米雪一改戲路演反派，完全代入紅姨的角色之後，奸得入型入格。

        最愛演員
        米雪奸出驚喜
        「個個演員都表現好好，不過最令我有驚喜嘅係紅姨（米雪），因為最初大家都擔心一向觀眾緣都唔錯嘅米雪，會因為角色太奸而不被觀眾受落，但係點知出嚟嘅效果好好，米雪嘅演技遮蓋晒所有嘢，簡直代入咗角色。」
       
       
        我是誰：張華標最愛《蓋世豪俠》
        《溏心風暴》編審張華標，加入無綫接近20年，90年曾監製由劉青雲、黎明及羅慧娟主演的劇集《人在邊緣》，其他作品包括有《大鬧廣昌隆》、《帝女花》、《巨人》及《萬里長情》等，最滿意的作品則是《西遊記》和《蓋世豪俠》（圖）。